વિચાર લહેરી

મુક્તક

જીવનની પોથીના પાન જાય ઘટતાં,
મિત્રોની યાદિમાં નામ જાય ખૂટતાં;
નવલું વર્ષ લાવે નવી આશને ઉમંગ,
પ્રાર્થના જગ કલ્યાણની રહીએ રટતાં

શૈલા મુન્શા તા. ૩૧ ડિસેમ્બર ૨૦૨૧

કુદરતની લીલા જુઓ અણદીઠી કેવી,
પળમાં જ અચંબિત કરે જગને એવી;
ઉકળતા રણમાં વરસે બરફનો વરસાદ,
વિજ્ઞાને કરેલી પર્યાવરણની મહાદશા જેવી!

શૈલા મુન્શા તા. માર્ચ ૨૧. ૨૦૨૧

૧- ભગવાન પણ ભુલો પડ્યો,
શોધી શોધીને એવો અડ્યો,
ભજવવા નાટક સ્વર્ગમાં,
શું અદાકારોને જ નડ્યો?

૨- આંચકા પર આંચકો આપે છે,
ધીરજ બસ લોકોની માપે છે,
વાસ્તવિકતા તો છે કપરી,
એ ગણિત શ્રધ્ધાનુ નાપે છે!!

3- દુઃખના દહાડા પણ જશે
ને સુખ જ સુખ રહેશે,
એ તરણાએ તરી જાશું,
વાત સાચી, સમય કહેશે.

4- ખુદ પર ભરોસો તો રાખ,
દર્દને ભીતર છુપાવી નાખ,
નજર હો ઉન્નતિના શિખરે,
તો આપીશ તકદીરને થાપ!

શૈલા મુન્શા ૦૫/૦૩/૨૦૨૦

૧ – અજબ આ દુનિયાની રીત છે,
માંગતા ના મળે એવી પ્રીત છે,
કોઈ કરે ના કરે કિંમત પ્યારની
ગોપીને મન તો કહાન મીત છે!

૨ – જિંદગીની કહાની બાકી છે,
કોઈ વાત અધુરી રાખી છે,
કહેવું ના કહેવું એ સોચમાં
આવરદા વિતાવી નાખી છે.

૩ – રંગોની બિછાત જાણે વસંત,
ખીલે ફુલ સુગંધી, માણે વસંત,
ભુલાય છે ઉદાસી પાનખરની,
નવપલ્લવિત ધાનના દાણે વસંત!

૪ – આશા નથી આંગણે આવશો તમે,
કોઈ ખુશી ખબર લાવશો તમે,
નિત પ્રભાતે તોય રાહ જોઉં છું,
કોઈ નિશાની પ્રેમની મોકલશો તમે!

શૈલા મુન્શા તા. ૦૨/૦૯/૨૦૨૦