વિચાર લહેરી

થતી નથી કોઈ વાત પુરી, ઈશારા વગર;
બોલતી જો આંખો, બંધ હોઠ ઈરાદા વગર.

માસુમિયત રહે અકબંધ દિલના ઉંડાણમાં,
જીવન ખીલી ઉઠે છે દિલાસા વગર.

પ્રારબ્ધ કે પુરુષાર્થ, ખેલ તકદીરનો;
રાખ દિલની અમીરી મીમાંસા વગર.

તરાજુમાં તોલ ના જીવનના સુખ દુઃખ,
મળ્યું તે પ્રેમથી સ્વીકાર પસ્તાવા વગર.

આજની ઘડી રળિયામણી આશ બસ રાખ,
જીવન જ્યોત પ્રગટાવ નિરાશા વગર.

શૈલા મુન્શા. તા.૨૬/૦૬/૨૦૨૬
www.smunshaw.wordpress.com

વડલાની છાંય પ્રેમ ઢોળે સહુ પર,
ન માગે કશું, ન રાખે ભેદભાવ.

પિતા ઘરની છત, આધાર સહુનો,
વરસાવે અણદીઠો પ્રેમ જીગરનો.

કરી લાડ ઝુલાવે સહુને
ધાક તોયે લાગતી સહુને.

શીખ એમની હરદમ રહે સ્મરણમાં,
જીવન આપે પડકાર હર ક્ષણમાં.

યુવાની આવતા આવશે સમસ્યા ઘણીએ,
યાદ રહે તરવું હરદમ સામા વહેણે.

પિતા તમ શીખ પ્રેરે બળ જીવનમાં,
આગવું અસ્તિત્વ પ્રગટાવે મુજમાં.

સમયના ઓવારે પાત્રો બદલાય છે,
મા બને દીકરીને દીકરી મા બની જાય છે.

પિતા ભલે રહેતા પિતા, પણ દીકરો;
ખબર નહિ ક્યારે મિત્ર બની જાય છે.

હસતી રમતી બહેનોનો વીરો,
સમય આવે રક્ષક બની જાય છે.

વારસો પિતાનો સંભાળતો દીકરો,
બાપથી સવાયો બનતો દીકરો.

અપાવે ગૌરવ પિતાને, ઉજાળતો નામ પિતાનું;
લાખેણા સંતાન જીવન સફળ બનાવે પિતાનું.

શૈલા મુન્શા તા. ૨૨/૦૬/૨૦૨૬
(ફાધર્સ ડે)
www.smunshaw.wordpress.com

આગ ઓકતો સૂરજ, ધીખતી ધરતી,
વૃક્ષો થયા નષ્ટ, ચીખતી વસતી.

જંગલો સિમેન્ટના ફૂટ્યાં કાળ જેવા,
નોંધારા બન્યા પશુ પક્ષી આશરો લેવા.

ઊકળતો લાવા તો જાય ઠરી, લીલીછમ્મ ધરતી કરી;
અગનગોળો વરસાવે આગ દિનરાત એક કરી.

ગુમાન માનવીનું સર્જે અણુબોમ્બ વિનાશકારી,
લાવશે પ્રલય બની બીજું હિરોશીમા નાગાશાકી.

જળ ત્યાં સ્થળ, સ્થળ ત્યાં જળ સર્જાયું મહાભારત;
વિનાશકાળે વિપરીત બુધ્ધિ, સર્જાશે બીજું મહાયુધ્ધ.

અવતાર લેશે ક્રુષ્ણ ફરી, કોણ જાણે?
થાશે માનવતાનો જય ફરી, કોણ જાણે?
થાશે માનવતાનો જય ફરી, કોણ જાણે?

શૈલા મુન્શા. તા. ૨૨/૦૫/૨૦૨૬

મૌનમાં છે સંમતિ માની ના લેશો,
કરી ઉતાવળ કાંઈ માપી ના લેશો.
છે ગતિ વધુ વિચારોની વાયરાથી,
વાડ બાંધી છે સદીના દાયરાથી.

પ્રારબ્ધ આપશે બધું ધારી ના લેશો,
મૌનમાં છે સંમતિ માની ના લેશો.

રમત છે જિંદગી, તો જીરવો હાર;
પડતાંને પાટુ, બસ સહી લો માર.
આવશે સુખ તું હિંમત એવી ધાર,
કર્મ કર, ફળની આશા ના રાખ.

કાલ અજાણી, વાત જાણી ના લેશો;
મૌનમાં છે સંમતિ માની ના લેશો.
મૌનમાં છે સંમતિ માની ના લેશો!

શૈલા મુન્શા તા. ૧૪/૦૫/૨૦૨૬
www.smunshaw.wordpress.com

વહી જાય વર્ષો મા કદી ભુલાતી નથી,
આરઝુ એક હાલરડાંની બુઝાતી નથી.

ઝબોળતી કદી પ્રેમના સાગર મહી,
ભૂલી અમારી સંતાડતી પાલવ મહી,

નીંદરે ઘેરાતી આંખલડી સજાવતી,
સપનાની ડાળે મુજને ઝુલાવતી;

હસી પાછળ દરદ એ છુપાવતી,
શીખ એ જ સદા અમને આપતી.

રહી ગઈ યાદ, તસવીરમાં ગઈ સમાઈ,
મા સ્મરણોની માળા સંવારતી ગઈ.

વહી જાય વર્ષો મા કદી ભુલાતી નથી,
આરઝુ એક હાલરડાંની બુઝાતી નથી.

શૈલા મુન્શા. તા. ૧૧/૦૫/૨૦૨૬
www.smunshaw.wordpress.com

ઉંમરનો તકાજો છે શાણપણનો,
પણ મનનો તકાજો છે ગાંડપણનો.

ડહાપણની સીધી રેખા ચાલવામાં,
મન ગૂંચવાય છે દુનિયા ભાળવામાં.

નજરો આંબતી રહી ચાંદ પામવામાં,
વેંત ઓછા પડ્યાં સપના માપવામાં.

ઢીંગલી સજાવી રમતાં થઈ મોટી,
જિંદગીની રમતમાં થઈ સાવ ખોટી.

વાઘાં બધાં ફગાવી લઉં જીવી આજે,
મરી મરીને જીવવું શીદ કાજે?

બસ ઊડું આજે ગગન આંબવા,
ઊડું આજે ગગન આંબવા!!

શૈલા મુન્શા. તા.૧૧/૦૫ ૨૦૨૬
www.smunshaw.wordpress.com

ભીતર ભંડારી જે વાત બહાર આવે છે,
ટહુકો એક પ્રેમનો એકરાર લાવે છે.

લખવો હતો કાગળ જે કોરો રહી ગયો,
લાગણીનો સંદેશ બસ અધૂરો રહી ગયો.

ઊગતી જવાનીના ઓરતાં ફોરે છે હર દિલમાં,
જગ જીતવાની તમન્ના જાગે છે હર દિલમાં.

ઉઘાડી કમાડ દિલના, નજર જ્યાં કરી;
તસ્વીર સચ્ચાઈની બસ પાંપણે આવી.

તરંગને તુક્કા ક્યાં પડે છે સાચા,
લાગે છે પ્રેમમાં છે હજી કાચા!

કાચી ઉંમરનો પ્રેમ જન્મે છે દિલમાં,
ધડકન બની સદા રહી જાય છે દિલમાં!
બસ રહી જાય છે દિલમાં!!

શૈલા મુન્શા તા.૦૬/૦૩/૨૦૨૬
www.smunshaw.wordpress.com

બદલાતી મોસમનો ઈશારો છે,
ખીલતાં ગુલમહોરનો નજારો છે.

આંબા ડાળે મંજરી ફેલાવતી સુવાસ,
ગુંજતો કોયલનો ટહુકો ચોપાસ.

દહન હોલિકાનું કરે બુરાઈનો નાશ,
પ્રેમ ભક્તિનો માર્ગ જીવનની આશ.

ઉજવે નર નારી સહુ રંગોનો તહેવાર,
કાનુડો ખેલતો ગોપી સંગ ફાગણનો ફાગ.

હોળીનો તહેવાર લાવે ખુશી હર જીવનમાં,
ભુલાવી વેરઝેર, ચઢે પ્રેમનો રંગ હર દિલમાં.
બસ ચઢે પ્રેમનો રંગ હર દિલમાં!!

શૈલા મુન્શા તા.૨૭/૦૨/૨૦૨૬
www.smunshaw.wordpress.com

વિદાય ભલેને હો અઘરી,
પણ યાદોની પેટી છે ભરેલી.

સમય ભલેને થાતો પસાર,
પણ નવીનતાનો છે આસાર.

વિત્યું વરસ ભલેને ચકડોળ જેવું,
સુખ દુઃખ, આશા નિરાશાથી ભરેલું;

હો સત્તા પલટો કે કુદરતનો કેર,
જીતે માનવતા ભુલીને વેરઝેર.

અંત ભલેને થાય ૨૦૨૫નું,
પણ સ્વાગત છે દિલથી ૨૦૨૬નું.

નવ વર્ષ લાવે નવજીવનની આશ,
હો સુખ શાંતિને સમૃધ્ધિ ચોપાસ;
હો સુખ શાંતિને સમૃધ્ધિ ચોપાસ.

શૈલા મુન્શા તા.૨૬/૧૨/૨૦૨૫
www.smunshaw.wordpress.com

સપના જો વેચાય તો લઉં ખરીદી,
પણ જિંદગી ક્યાં ખરીદાય છે!

સુધારાય જો ભૂલ તો લઉં સુધારી,
પણ માફી ક્યાં મંગાય છે!

બાળપણ મળે પાછું, તો લઉં બચાવી;
પણ બુઢાપો ક્યાં રોકાય છે!

મળે જો તક તો માસુમિયત લઉં સાચવી,
પણ હેવાનિયત ક્યાં અટકાવાય છે!

મોત જો રોકાય તો લઉં રોકી,
ક્ષણ ક્યાં એક આઘીપાછી થાય છે!

મનની મુરાદ જો ફળે તો માંગુ ઈશ્વરી શક્તિ,
માણસાઈ ભરી દુનિયા બનાવી લઉં!

સપના જો વેચાય તો લઉં ખરીદી,
પણ જિંદગી ક્યાં ખરીદાય છે!

શૈલા મુન્શા. તા.૭/૧૨/૨૫
www.smunshaw.wordpress.com